Serat Kalatidha

SERAT KALATIDHA

Karya :

Raden Ngabehi Ranggawarsita

Mangkya darajating praja

Kawuryan wus sunyaruri

Rurah pangrehing ukara

Karana Tanpa palupi

Atilar silastuti

Sujana sarjana kelu

Kalulun kalatidha

Tidhem tandhaning dumadi

Ardayengrat dene karoban

Ratune Ratu utama

Patihe patih linuwih

Pra nayaka Tyas raharja

Penekare becik becik

Parandene Tan dadi

Paliyasing kala bendu

Mandar mangkin mandadra

Rubeda angrebedi

Beda beda ardaning wong sak negara

Katetangi tangisiro

Sira sang paramengkawi

Kawileting tyas duhkita

Katameng ing ren wirangi

Dening upaya sandi

Samaruna angrawung

Mangimur manuhara

Met pamrih melik pakolih

Temah suhha ing karsa tanpa wiweka

Dasar karoban pawarta

Bebaratun ujar lamis

Pinudya dadya pangarsa

Wekasan malah kawuri

Yan pinikir sayekti

Mundhak apa aneng ngayun

Andhedher kaluputan

Siniraman banyu lali

Lamun tuwuh dadi kekembangin  beka

Ujaring panitisastra

Awewarah asing peling

Ing jaman keneng musibat

Wong ambek jatmika kontit

Mengkono yen niteni

Pedah apa amituhu

Pawarta lolawara

Mundhuk angreranta ati

Angurbaya angriket cariteng kuna

Keni kinarta darsana

Panglimbang ala lan becik

Sayekti akeh kewala

Lelakon kang dadi tamsil

Masalahe ngaurip

Wahaninira tinemu

Temahan anarima

Mupus pepesthening takdir

Puluh - pulung anglakoni kaelokan

Amenangi jaman edan

Ewuh ayang ing pambudi

Milu edan nora tahan

Yen tan milu anglakoni

Boya kaduman melik

Kaliren wekasanipun

Ndilalah karsa allah

Begja - begjane kang lali

Luwih begja kang eling lawan waspada

Semono iku bebasan

Padu padune kepingin

Enggeh mekoten man doblang

Bener engkang angarani

Nanging sajroning batin

Sejatine nyamut nyamut

Wes tuwa arep apa

Muhung mahas ing asepi

Supaya antuk pangaksamaning Hyang sukma

Beda lan kang wus santosa

Kinarilah ing Hyang widhi

Satiba malanganeya

Tan susah ngupaya kasil

Saking mangunah prapti

Pangeran paring pitulung

Marga samaning titah

Rupa sabarang pakolih

Parandene maksih taberi ikthiyar


Sakadare linakon mung tumindak mara ati
Angger Tan dadi prakara
Karana riwayat muni
Ikhtiyar iku yekti
Pamilihing reh rahayu sinambi budidaya
Kanti awas lawan eling
Kanti kaesthi antuka suksma


Ya allah ya rasulullah
Kang sipat murah lan asih
Mugi - mugi aparinga pitulung ingkang martani
Ing alam awal akhir
Dumununging gesang ulun mangkya sampun awreda
Ing wekasan kadi pundi
Mula mugi wontena pitulung tuwan


Sageda sabar santosa
Mati sajroning ngaurip
Kalis ing reh aruraha
Murka angkara sumingkir
Tarlen meleng malah sih
Sanistyaseng Tyas mematuh
Badharing sapudhendha antuk mayar sawetawis
Borong Angga sawarga mesi martaya